SBI Home Loan | स्टेट बँक ऑफ इंडियाने (SBI) गृहकर्जदारांसाठी आनंदाची बातमी दिली आहे. रिझर्व्ह बँक ऑफ इंडियाने 6 जून रोजी रेपो रेटमध्ये 50 बेसिस पॉईंटची कपात केल्यानंतर स्टेट बँकेनेही त्याचा प्रत्यक्ष फायदा ग्राहकांना देण्याचा निर्णय घेतला आहे. या निर्णयामुळे गृहकर्जावरचा ईएमआय आता स्वस्त होणार आहे.
नवीन व्याजदर 15 जून 2025 पासून लागू होणार असून, हे दर ग्राहकांच्या क्रेडिट स्कोअरवर आधारित असतील. सिबिल स्कोअरच्या आधारावर गृहकर्जासाठी 7.50% ते 8.45% दरम्यान व्याज आकारले जाईल. यासोबतच बँकेने 444 दिवसांच्या विशेष ठेव योजनेवरील व्याज दरातही 25 बेसिस पॉईंटने कपात केली आहे.
रेपो रेट कपातीचा थेट फायदा गृहकर्जदारांना :
स्टेट बँकेचे गृहकर्ज ‘External Benchmark Lending Rate’ (EBLR) ला लिंक असते, आणि EBLR थेट रेपो रेटशी संबंधित असतो. त्यामुळे रेपो रेट कमी झाला की त्याचा परिणाम थेट गृहकर्जाच्या दरांवर होतो. सध्या स्टेट बँकेचा EBLR 8.15% आहे. त्यामुळे नवीन दरांमुळे ग्राहकांचा मासिक हप्ता (EMI) आता कमी होणार आहे, ज्यामुळे आर्थिक बचत होईल.
ग्राहकांचा सिबिल स्कोअर जितका चांगला असेल, तितक्याच कमी दराने कर्ज मिळण्याची शक्यता असते. उदाहरणार्थ, 900 स्कोअर असलेल्या ग्राहकाला 7.50% दराने कर्ज मिळू शकते. याउलट, ज्यांचा स्कोअर कमी आहे त्यांना थोड्या अधिक दराने कर्ज मिळू शकते.
SBI Home Loan | फ्लोटिंग व्याजदर असलेल्यांनाच थेट फायदा :
रेपो रेटमध्ये झालेल्या कपातीचा थेट फायदा फक्त फ्लोटिंग दरावर कर्ज घेतलेल्या ग्राहकांना होणार आहे. ज्यांनी निश्चित (fixed) दराने कर्ज घेतले आहे त्यांना या कपातीचा फायदा मिळणार नाही. त्यामुळे नवीन ग्राहक आणि फ्लोटिंग व्याजदरावर असलेले ग्राहक यांच्यासाठी ही संधी चांगली आहे.
दरम्यान, स्टेट बँकेने MCLR (Marginal Cost of Funds Based Lending Rate) मध्ये कोणताही बदल केलेला नाही. हा दर कर्ज देण्यासाठी किमान मर्यादा असतो. एका वर्षासाठी MCLR 9.00%, सहा महिन्यांसाठी 8.90%, तीन महिन्यांसाठी 8.55% आणि एका महिन्यासाठी 8.20% इतका आहे.
इतर बँकाही स्पर्धेत उतरल्या :
एसबीआयने व्याजदर कपात करण्याचा निर्णय घेतल्यापूर्वी अनेक खासगी आणि सरकारी बँकांनी देखील आरबीआयच्या रेपो रेट कपातीचा फायदा देत आपले गृहकर्ज दर कमी केले होते. त्यामुळे गृहकर्ज घेण्याचा विचार करणाऱ्यांसाठी ही संधी अत्यंत फायदेशीर ठरू शकते.
या निर्णयामुळे घर घेण्याचं स्वप्न पाहणाऱ्यांना मोठा दिलासा मिळाला आहे. व्याजदर कमी झाल्यामुळे घर खरेदीसाठी आर्थिक भार कमी होणार असून, EMI कमी झाल्याने दरमहा जास्त बचत होऊ शकते.